Autoritetet në San Francisco kanë vendosur t’ia plotësojnë dëshirën pesëvjeçarit Miles, i cili është në prag të vdekjes, që ai të jetë Batman për një ditë. Kështu, San Francisco më 15 nëntor do të jetë Gotham City, ndërsa për Milesin do të organizohen një numër aktivitetesh dhe aventurash.
Miles vuan nga leukemia dhe frymëzimin e gjen tek superheroenjtë. Kur fondacion Make-a-Wish e pyeti se cila është dëshira e tij më e madhe, ai habiti ata dhe prindërit kur tha se dëshiron të jetë Batkid.
Fondacioni vendosi ta ndihmojë atë në realizimin e dëshirës, ndërsa kanë kërkuar nga publiku i gjerë që të marrë pjesë në këtë. I gjithë 15 nëntori do t’i kushtohet përmbushjes së ëndrrës së Milesit.
Në mëngjes do të jepet lajmi se shefi i policisë pyet këdo nëse e di se ku gjendet Batkidi, meqë është i domosdoshëm për “zgjidhjen e një krimi dhe arrestimin e keqbërësit”. Dita e Milesit do të përfshijë shpëtimin e zonjave në nevojë, të lidhura me tela, ndalimin e Riddlerit në plaçkitjen e bankës, drekë në Burger Bar, një mesazh të veçantë për shefin e policisë që të shikojë në dritare në Union Square, ku një grup i madh i vullnetarëve kanë kërkuar ndihmën e tij .
Pinguini do të rrëmbejë një maskotë të famshme të San Franciskos, ndërsa Batkid do të duhet ta shpëtojë. E, ndalesa e fundit do të jetë bashkia e qytetit, ku atë do ta falënderojë kryetari dhe shefi i policisë, të cilët do t’ia dorëzojnë çelësat e qytetit.
“Për shkak se ai dëshiron të jetë një superhero, ne organizuam një turmë të tërë njerëzish me parulla, për ta bërë atë që të ndjehet tamam si një hero”, ka thënë Jen Wilson nga Fondacioni Make-a-Wish, duke shtuar se interesi për përmbushjen e kësaj dëshire është shumë i madh dhe se pret mijëra pjesëmarrës.
Ngjarjes i është përgjigjur edhe Twitter, i cili tërë ditën do të lëshojë “cicërima” për karakteret e ndryshme që marrin pjesë në këtë skenar.
Miles, natyrisht, nuk di asgjë rreth kësaj dite. Ai di vetëm se ndoshta do ta marrë një kostum të Batmanit. /Telegrafi/
No comments:
Post a Comment